Psalm 21

21 ¹ לַמְנַצֵּחַ מִזְמוֹר לְדָוִד׃

2     יהוה בְּעָזְּךָ יִשְׂמַח־מֶלֶךְ וּבִישׁוּעָתְךָ מַה־יָּגֶיל מְאֹד׃

3     תַּאֲוַת לִבֹּו נָתַתָּה לֹּו וַאֲרֶשֶׁת שְׂפָתָיו בַּל־מָנַעְתָּ סֶּלָה׃

4     כִּי־תְקַדְּמֶנּוּ בִּרְכוֹת טוֹב תָּשִׁית לְרֹאשֹׁו עֲטֶרֶת פָּז׃

5     חַיִּים שָׁאַל מִמְּךָ נָתַתָּה לֹּו אֹרֶךְ יָמִים עוֹלָם וָעֶד׃

6     גָּדוֹל כְּבוֹדֹו בִּישׁוּעָתֶךָ הוֹד וְהָדָר תְּשַׁוֶּה עָלָיו׃

7     כִּי־תְשִׁיתֵהוּ בְרָכוֹת לָעַד תְּחַדֵּהוּ בְשִׂמְחָה אֶת־פָּנֶיךָ׃

8     כִּי־הַמֶּלֶךְ בֹּטֵחַ בַּיהוה וּבְחֶסֶד עֶלְיוֹן בַּל־יִמּוֹט׃

9     תִּמְצָא יָדְךָ לְכָל־אֹיְבֶיךָ יְמִינְךָ תִּמְצָא שֹׂנְאֶיךָ׃

10     תְּשִׁיתֵמוֹ כְּתַנּוּר אֵשׁ לְעֵת פָּנֶיךָ יהוה בְּאַפֹּו יְבַלְּעֵם וְתֹאכְלֵם אֵשׁ׃

11     פִּרְיָמוֹ מֵאֶרֶץ תְּאַבֵּד וְזַרְעָם מִבְּנֵי אָדָם׃

12     כִּי־נָטוּ עָלֶיךָ רָעָה חָשְׁבוּ מְזִמָּה בַּל־יוּכָלוּ׃

13     כִּי תְּשִׁיתֵמוֹ שֶׁכֶם בְּמֵיתָרֶיךָ תְּכוֹנֵן עַל־פְּנֵיהֶם׃

14     רוּמָה יהוה בְּעֻזֶּךָ נָשִׁירָה וּנְזַמְּרָה גְּבוּרָתֶךָ׃

^[1]

The fire of the Lord will one day consume everything, every part of us all.  That is a thought, whether we are in His presence or cast from it we are going to be blown away by what we see.

---

^[1]The Hebrew Bible : Andersen-Forbes Analyzed Text; Bible. O.T. Hebrew. Andersen-Forbes. 2006; 2006 (Ps 21:1-14). Logos Bible Software.